KALIBO, Aklan — Hugut nga ginkundina it grupong Bagong Alyansang Makabayan (BAYAN)-Aklan ro nagakatabu nga korapsyon partikular sa mga maanomalyang flood control project ag ro maeapnagon nga korapsyon sa gobyerno.
Suno kay kim Sin Tugna, provincial coordinator it BAYAN-Aklan nga oras eon nga maghueag ro gobyerno ag maghimo it nagakaigo nga tikang agud nga mapasabat ro mga korap nga opisyal ag matapna ro mis-allocation it pondo eabi eon sa mga infrastructure projects.
Dapat suno kana nga taw-an it atensyon it gobyerno ro basic social services para sa kamaeayran it mga pumueuyu.
Sa makaron hay nagatueor-an sigon ro mga kontraktor, DPWH, ag mga pulitiko angot sa mga “ghost projects” ag flood control program sa baylo nga akuon ro responsibilidad sa sistematikong pag-abuso sa pondo it nasyon.
Ro nagakatabu sigon makaron hay nagapakita eamang kon ano kabulok ro bureaucrat capitalism kun sa siin ginagamit it mga pulitiko ro andang posisyon sa burukrasya agud nga magkamkam sa manggad it nasyon ag mag angkon it pabor ag prebilehiyo para paeaparon ro andang impluwensya ag manggad.
Kim Sin Tugna, provincial coordinator it BAYAN-Aklan
