KALIBO, Aklan — Imposible nga matapos sa anang target date nga Disyembre it makaron nga dag-on ro construction it bag-ong Kalibo public market.
Raya ro ginpahayag ni Sangguniang Bayan member Ronald Marte kasunod it request ni Kalibo mayor Juris Sucro nga resolution of authorization nga maka-renew it kontrata sa pamilya Garcia sa eugta nga gin-rentahan it LGU para sa temporaryo nga lokasyon it tindahan sa kaiping it eastern side terminal sa San Lorenzo Drive.
Maskin sigon ro alkalde hay nagakabaeaka eon sa mahinay nga construction it Kalibo public market.
Angot kara, gindesisyunan sigon it konseho nga antes nga aprubahan ro request ni Mayor Sucro hay igapatawag anay ro contractor it proyekto agud nga masayuran ro mga rason kon ham an nga mahinay ro andang trabaho.
Dugang nga kon owa nagsangag ro isyu angot sa mga anomaliya sa flood control projects hay owa pa sigon nataeupangdan ro problema ag gindugangan it contractor ro andang mga tawuhan.
Apang maskin nga nagdugang hay bukon it bastante agud nga mapadasig ro pag-obra.
Nagakabaeaka ro konseho bangud nga maskin nga natapos eon ro kontrata hay owa pa it 50 porsiytento ro natapos sa proyekto kun sa siin puro frameworks pa eang ro gina-obra.
