NEW WASHINGTON, Aklan — Nagpanindugan ro bag-ong appoint nga si Punong Barangay Angelita Fritzsche it Cawayan, New Washington nga masarangan nana nga depensahan ro anang ginhimo nga desisyon nga pagsibak sa mga barangay workers nga puro kaalyado it ginbayluhan nana sa pwesto.
Suno kana nga mismong ro anang ginpahalin nga daywang Barangay Nutrition Scholars, 21 nga Barangay Health Workers, 20 nga barangay tanods ag napueo nga lupon ro nagpahayag nga engkaso nga mapatalsik ro punong barangay nga nag appoint kanda hay magahalin man sanda sa pwesto.
Dugang pa nga nagdesisyon ro konseho nga pahalinon sanda bangud sa owa eon sanda nagapakita it nagakaigo nga pag-respeto .
Sa makaron hay “business as usual” ro andang operasyon ag owa naapektuhan ro andang trabaho bangud nga may napili man eagi sanda nga igabueos sa mga ginpahalin nga empleyado it barangay.
Punong Barangay Angelita Fritzsche it Cawayan, New Washington.
Sa pihak nga parte, ginpaathag ni Kapitan Fritzche nga ginpahalin sa serbisyo it taeatapan it Ombudsman ro andang dating punong barangay nga si Clyde Custodio matapos mapamatud-an nga guilty sa kaso angot sa illegal nga pag-terminate sa andang dating barangay secretary ag pag-peke sa pirma it sambilog sa andang barangay kagawad.
Ro gin patalsik nga barangay secretary kaibahan ro limang council ro pormal nga nagpasaka it kaso sa Ombudsman.
Nag-ugat sigon ro isyu sa pagpasilabot it dating kapitan sa pondo it Sangguniang Kabataan (SK) nga ginpuna it andang barangay secretary nga naging rason it pagpahalin kana sa trabaho.
