NUMANCIA, Aklan — Mga menor de edad ro natumod nga responsable sa pagpanamad ukon vandalism sa sueod it sementeryo it Iglesia Filipina Independiente nga mas kilaea man sa tawag nga Aglipayan Church sa Barangay Badio, Numancia ko nagtaliwan nga domingo.
Raya ro ginkumpirma ni Punong Barangay Victor Crispino it nasambit nga lugar.
Suno kana nga sangka menor de edad ro nag-aku sa nahimo nga saea ag sa anang pakikipag-istorya hay ginsugid kara ro iba pa nana nga mga kaibahan nga puro man nga minors.
Natabu ro insidente ko Disyembre 26 kun sa siin matapos sigon nga makakita it pintura hay gintum-oy nanda ro andang mga alima ag nag-obra it hand prints sa mga nitso.
Sa pihak nga parte, gintau eon sigon nana ro pangaean it mga vandals sa Numancia Municipal Police Station .
Hugut man imaw nga nakikipag-angot sa Women and Children Protection Desk it Numancia MPS ag sa Municipal Social Welfare and Development Office ukon MSWDO sa mga tikang nga gina-himo.
Dugang pa nga ro vandalism hay sangka krimen rason nga posibleng ipatawag it MSWDO ro mga menor de edad kaibahan ro andang mga ginikanan pagkatapos it holiday agud nga mapasabat sa nahimo nga pag-eabag ag igapaidaeum sa nagakaigo nga intervention.
Apela man nana sa mga ginikanan nga magkooperar ag indi pagkunsintihon ro saea it andang mga unga.
Nauna kara, ginpahayag ni Kapitan Crispino nga matapos ro ginpatawag nga emergency meeting, sangka resolusyon ro ginhimo it Sangguniang Barangay it Badio, Numancia nga hugut nga nagakondena sa natabu nga vandalism sa sueod it nasambit nga sementeryo.
Ginpasiguro man nanda sa pamunuan it simbahan nga paga-aksyunan ro problema sa mas madali nga tiempo.
