BORACAY, Island — Eubus nga ginkalipay it lokal nga gobyerno it Malay ro uman nga pagkilaea sa isla it Boracay bilang Best Luxury Island Destination sa World Travel Awards 2025.
Ro nasambit nga kadungganan hay uman nga nagapamatuod nga ro Boracay hay sambilog sa mga ginapilian nga bakasyunan it mga turista halin sa nagkaeain-eain nga bahin it kalibutan.
Sa idaeom it mga kahanga-hangang sunset hay ro minatuod nga luho it nasambit nga paraiso hay ro kahipos ag paeahuwayan nga nagatao it daean agud nga nam-namon ro kada minuto it katawhayan.
Madumduman nga madinaeag-on nga naeampasan it lokal nga gobyerno it Malay ro targeted 2 milyon tourist arrival ko dag-on 2025.
Nailista it Malay-Boracay Tourism Office ro kabilugang 2, 155, 217 foreign and local tourists nga bumisita sa Boracay halin Enero hasta ko Disyembre 2025.
Sa nasambit nga numero, libo-libong dumueoong turista ro naghalin pa sa mga nasyong Korea; United States of America; Australia; Taiwan; Russia; China; United Kingdom; Japan; Germany ag India.
Bumuhos ro maabong bisita ko nagtaliwan nga kapaskwahan hasta sa pagsug-aeaw it Bag-ong Dag-on.
Sa makaron hay padayon nga ginaconsolidate it Malay-Boracay Tourism Office ro datos it tourist arrival sa unang daywang dominggo it Enero 2026.
