KALIBO, Aklan—Posibleng makaangkon it opisina ro Department of Migrant Workers (DMW) sa probinsya Aklan.
Raya hay kasunod it courtesy visit it DMW Regional Office VI sa Aklan provincial government, sa pagpanguna ni Regional Director Glenda M. Aligonza, Assistant Regional Director Rhea Glynda D. Calantas, ag Atty. Zha-Zha Maguad-Padernal.
Nakipagpueong ro grupo kay Aklan Governor Jose Enrique Miraflores kaibahan si Marsh B. Bernabe, head it Office of the Provincial Public Employment Service Manager (OPPESM).
Suno kay Bernabe, gintalakay kara ro importanteng mga serbisyong ginataeana para sa mga overseas Filipino workers sa probinsya partikular ro plano it DMW nga magbutang it opisina sa Aklan Provincial Capitol compound agud nga mapaeapit pa gid ro andang serbisyo.
Bangud kara, kinahang-ean nga makaangkon anay it memorandum of agreement sa tunga nanda it Aklan provincial government ag sa oras nga maisapinal raya hay pagaumpisahan eon ro nasambit nga plano.
Tuyo kara nga mapamayad ro access ag paghatod it mga programa ag serbisyo para sa Overseas Filipino Workers (OFWs) ag sa andang mga pamilya, kaibahan ro mas madasig nga koordinasyon, mas maayos nga bulig ag mas malig-on nga presensya it ahensya.
Angot kara, ginpahayag dugang ni Bernabe nga eubus nga ginkalipay it gobernador ro plano DMW kon sa siin eubus ro anang suporta sa nasambit nga nga inisyatibo bangud nga makabenepisyo kara ro mga Aklanon ag mga kaeapit nga probinsya.
