Nakabaton ro Pre-Trial Chamber (PTC) 1 it International Criminal Court (ICC) halin sa Registry kara it mga dugang nga aplikasyon halin sa mga gustong mairehistro bilang mga biktima sa mga kasong ginapangatubang ni dating Pangueong Rodrigo Duterte.
Sa sangka ap-at nga pahinang dokumento nga may petsang Pebrero 9, ginpahayag it ICC Registry nga naipadaea eon kara sa Chamber ro 227 nga aplikasyon nga ginaeakipan it 500 nga aplikante.
Mag-eowas pa raya sa naunang grupo it 39 nga biktima nga ginpasugtan it Chamber ko Enero 26 nga magpasakop.
Ro 500 aplikante hay sa idaeum it “Group A,” sangka klasipikasyon para sa mga tawong ro mga pahayag hay klaru nga nakasandig sa sakop it imbestigasyon.
Sa makaron, ro “Duterte Case” hay nagasakop sa mga pagpatay o hana nga pagpatay nga nahimo sa Davao City sa katung-anan it Nobyembre 1, 2011, ag Hunyo 30, 2016 ag mga pagpatay ukon hana nga pagpatay nga nahimo sa bilog nga Pilipinas umpisa Hunyo 30, 2016, hasta Marso 16, 2019.
Ginakabig nga “confidential ex parte” ro mga personal nga impormasyon it 500 biktima nga ro buot hambaeon hay pwede eamang raya nga ma-access it Registry ag Common Legal Representatives of Victims.
Si Duterte hay gin-aresto ko Marso 11 pag-abot nana halin sa Hong Kong ag gindaea sa The Hague sa Netherlands kun sa siin imaw presenteng nakakulong.
Nakataeana ro anang confirmation of charges hearing sa Pebrero 23.
Samtang, ginpangaeanan it ICC ro co-perpetrator ni Duterte nga ginaeakipan nanday dating PNP chief ag presenteng Senador Bato Dela Rosa, ag dating special assistant ni Duterte ag presenteng Senador Bong Go.
Nagguwa man ro mga pangaean nanday Vicente Danao, Camilo Cascolan, Oscar Albayalde, Dante Gierran, Isidro Lapeña, kamana man ro iba pang miyembro it PNP ag mga high-ranking official.
