Makabig nga una sa all-time high ro presyo it langis sa Pilipinas matapos ro ikaywang bugso it bigtime oil price hike.
Suno kay Department of Energy (DOE) Secretary Sharon Garin, nailista it taeatapan ro daywang magkasunod nga pinakamataas nga pagtaas it presyo it produktong petrolyo sa kasaysayan it nasyon.
Raya eon sigon ro makabig nga all-time high consecutive price hike sa sektor it petrolyo. Raya sigon ro pinakamataas nga presyuhan it mga nasambit nga produkto base sa record it kasaysayan.
Dugang pa it sekretaryo nga posibleng mas mataas pa ro presyo it langis sa mga lugar nga maeayo sa National Capital Region, partikular sa mga lugar nga nagakinahangean it mas mahabang biyahe para maihatud ro supply it petrolyo.
Naging epektibo ko Martes, Marso 10, ro unang bigtime price hike, pilang adlaw matapos magtuhaw ro giyera sa Middle East kun sa siin maabu nga mga nasyon ro nadaeahig sa maeapnagon nga bakbakan.
Makaron nga Martes, Marso 17, ginpatuman man it mga kompanya it langis ro ikaywang bugso it pagtaas.
Kun pagasumahon, nag-abot eon sa haeos P50 ro ginsaka it presyo it diesel, masobra sa P42 sa kerosene, ag masobra sa P25 sa gasolina.
