KALIBO, Aklan — Gindepensahan it Bagong Alyansang Makabayan (BAYAN) Aklan ro mga naapektuhan nga residente sa ginbutang nga kurae it pamilya Daroy sa eugta nga andang ginapanag-iyahan sa parte it Calachuchi Road, Bgy. Andagao, Kalibo.
Suno kay Kim Sin Tugna, provincial coordinator it Bayan-Aklan nga kunta hay nakaangkon anay it ejectment proceedings sa pagbawi it property agud nga mataw-an it kahigayunan ro mga raya nga maka-usoy it andang masayluhan.
Owa sigon ginakontra it mga apektadong residente ro pag-claim it eugta it mga tagapagmana ni Jesus Uy Daroy Sr. basta nga mapatuman ro andang kinamatarung nga haeos 30 anyos nga nag-istar sa lugar.
Makabig suno kana nga illegal detention ro natabu bangud nga owa it maagihan ro mga apektadong residente sa ginbutang nga kurae kun sa siin pila sa mga raya hay mga inunga ag mga babayeng nabdos.
Samtang, mabahoe man ro pagpasaeamat it grupo matapos nga nakita ro presensiya it Integrated Bar of the Philippines (IBP) Aklan Chapter sa lugar sa ginpatigayon nga ocular inspection agud nga matumod kon may gin-eabag nga tawhanong kinamatarung.
