Ginkalipay it Office of the Prosecutor (OTP) it International Criminal Court (ICC) ro pagpaguwa it arrest warrant kontra kay Senador Ronald “Bato” dela Rosa, nga opisyal eon nga ginakabig bilang suspek sa nagapadayun nga crimes against humanity case sa ICC.
Sa sangka statement, ginpahayag it OTP nga sangka importanteng tikang ro nasambit nga warrant kontra kay Dela Rosa sa nagapadayun nga pag-usoy it hustisya sa gina-alegar nga mga nahimo nga krimen sa idaeum it war on drugs campaign sa Pilipinas.
Suno sa OTP, pagapadayunon it taeatapan ro maid-id nga pakikipag-angot sa Registry ag sa tanan nga natungdan nga stakeholders para mapadali ro pagsirbi it warrant.
Dugang pa it Prosecutor, ro sekretong arrest warrant hay gin-isyu ko Nobiyembre 6, 2025, tatlong adlaw matapos ipasaka ro nasambit nga request. Ginpahisayod sigon raya sa natungdan nga otoridad it Pilipinas matapos nga maipaguwa.
Nauna kara, ginmandu it ICC Pre-Trial Chamber I ro pag-reclassify sa warrant para obrahon raya nga “public” halin sa pagiging confidential.
Madumduman nga si Dela Rosa ro nauna eon nga gintumod bilang sambilog sa co-perpetrator ni dating Pangueong Rodrigo Duterte sa gina-alegar nga crimes against humanity.
Suno sa OTP, base sa andang gin-presentar nga ebidensiya, nakitaan it Trial Chamber nga may reasonable grounds ukon bastante nga basehan agud nga patihan nga si Dela Rosa, bilang dating Davao City Police Director ag ko ulihi hay naging PNP Chief, hay responsable sa crimes against humanity bangud sa gina-alegar nga mga pagpatay sa kasagsagan it drug war it Duterte administration.
