KALIBO, Aklan — Igalunsar it Department of Education (DepEd) Region 6 ro regionwide Brigada Eskwela bilang pagpahaum sa pagbukas it School Year 2026-2027 sa Hunyo 3, 2026 sa Maayon National High School sa Maayon, Capiz.
Suno kay DepEd Regional spokesperson Hernani Escular Jr., maatrasar ro andang paglunsar it Brigada Eskwela nga nakataeana, adlaw it Lunes, Hunyo 1 hasta 5, bangud sa andang partisipasyon sa Palarong Pambansa 2026 sa Agusan del Sur.
Apang preparado sigon ro masobra sa 2,000 nga mga pampublikong eswelahan sa bilog nnga Western Visayas sa pagpasakop sa nasambit nga programa makaron nga adlaw it Lunes.
Tuyo sigon kara nga masiguro ro maayos nga pagbukas it klase sa bilog nga rehiyon kamana man nga mapadasig ro enrollment process, masabat ro mga concern it publiko, ag masiguro nga haum ro mga eskwelahan para sa panibag-ong school year.
Kapin sa 16 nga ahensya it gobyerno ag utility partners ro magapasakop sa preparasyon para sa pagbukas it klase.
Kaibahan kara ro Department of the Interior and Local Government (DILG), Philippine National Police (PNP), Department of Health (DOH), ag iba pa nga magadumaea sa pagpatuman it safety, health, ag traffic management measures sa mga eskwelahan.
Agud nga mas pa nga mapadali ro pagsabat sa mga concern it mga ginikanan ag estudyante, ginpahayag ni Escullar nga maga-operate man ro Oplan Balik Eskwela Public Assistance Command Center pinaagi sa hotlines, text messaging, email, ag social media platforms halin sa central, regional, division, hasta sa school levels.
Gin engganyo man it DepEd-6 ro publiko nga makipagbueuligan agud nga maging maayos ag eowas ro pagbukas it klase makaron nga dag-on.
