Posibleng humina ro piso hasta P63 kada US dollar bago matapos ro 2026 bangud sa nagahinang suporta sa lokal nga kwarta, suno sa ANZ Research.
Sa ginpaguwa kara nga Asia Economic Outlook, ginpahayag it ANZ nga maskin nga nakabulig sa piso ro optimismo sa posibleng kasugtanan sa tunga it Estados Unidos ag Iran, ginaeauman eamang raya nga panandalian bangud sa external deficit it nasyon, kawad-an it kasiguraduhan sa lokal nga pulitika, ag ginaeauman nga mas hugut nga polisiya it US Federal Reserve.
Suno pa sa ANZ, nakabulig ro mahinang piso sa pagpataas it haega it remittances it overseas Filipino workers ag nagapabaskog sa kasiguraduhan nga makipagkumpitensya it mga exporter. Sa pihak kara, pwede man raya nga magtuga it mas mataas nga imported inflation ag dugang nga gastos sa pagbayad it utang nga nakabase sa foreign currency.
Nauna eon nga ginpahayag ni Bangko Sentral ng Pilipinas (BSP) Governor Eli Remolona Jr. nga posibleng makabulig ro paghina it piso sa pagbaskog it exports ag pagbawas sa trade deficit, apang pwede man kara nga iduso pataas ro inflation. Ginpamilit man nana nga owa nagataeana ro BSP it partikular nga target sa balor it piso ag ginapasugtan ro market forces nga magtaeana it exchange rate.
Ginaeauman man it ANZ nga magapatuman pa ro BSP it tig-25 basis points nga pagtaas sa benchmark interest rate sa Agosto ag Oktubre, nga magaduso sa policy rate sa 5.25 porsiyento pag-abot it katapusan it dag-on.
