Owa pa it naging desisyon ro Senate impeachment court sa hinyu it House prosecution panel nga ipa-subpoena ro tax ag bank records ni Vice President Sara Duterte ag asawa kara nga si Manases Carpio.
Gin-anunsyo ni Senate impeachment court Presiding Officer Francis “Chiz” Escudero nga ginkasugtanan it mga senator-judge sa sangka closed-door caucus nga ipaiway anay ro pagresolba sa mosyon hasta sa uman nga hearing sa Lunes, Hulyo 20.
Suno kay Escudero, kinahangean pa it mas maabung oras it mga senator-judge agud nga tun-an ro mga memorandum nga ginpasaka it magtimbang nga parte ag usisaon ro mga komplikadong isyu angot sa nasambit nga hinyu.
Sa pagbalik it impeachment court, pagataw-an ro kada senator-judge it hasta sa 10 minuto agud nga magpangutana sa prosekusyon ag depensa bago pagbotohan ro mosyon.
Ginpamilit it House prosecution panel nga importante ro tax ag bank records agud nga mapamatud-an ro gina-alegar nga indi maipaathag nga manggad nanday Duterte ag Carpio ag magsirbing ebidensya sa impeachment case.
Ginapamaeabagan man raya it depensa ag ginpamilit nga owa it bastante nga factual ag legal nga basehan ro hinyu kamana man nga naga-eabag raya sa kinamatarung sa privacy ag due process it mag-asawa, ag makabig sigon nga sangka “fishing expedition” sa pag-usoy it ebidensya.
