Ginpahayag ni Sangguniang Panlalawigan Member Apolinar Cleope nga ginaplano it Gobyerno it Probinsya it Aklan ro pag-utang it P550 milyon sa Philippine Veterans Bank agud masuportahan ro nagakaeaineain nga imprastraktura sa probinsya.
Suno kana, ro pondo hay pagagamiton sa pag-ayos it Malay ag Ibajay District Hospitals, pagbakae it eugta para sa pagpatindog it bag-ong district hospital sa banwa it Lezo, ag sa repair ag rehabilitation it Caticlan Jetty Port.
Apang, gin-ako man nana nga kueang pa gihapon ro nasambit nga kantidad agud matuman ro tanan nga paginahangean it mga health facilities sa Aklan.
Nagdugang pa si Cleope nga pinaagi sa Hospital Infrastructure Program it national government, nabuhinan ro gastuhon it gobyerno it probinsya bangud may suporta nga halin sa nasyonal nga gobyerno.
Gintaeana man ro kapin sa P50 milyon para sa pagbakae it sangka ektarya nga eugta nga pagtukuran it Lezo District Hospital.
Kon maaprubahan ro loan, suno kana, raya eon ro magaimaw nga utang it Gobyerno it Probinsya it Aklan, bangud uwa eon sanda it may nabilin nga outstanding balance sa bisan ano nga government financial institution.
