KALIBO, Aklan — Pinaagi sa sangka resolusyon, ginpasugtan it Sangguniang Panlalawigan it Aklan si Gobernador Jose Enrique “Joen” Miraflores nga makipag-negosasyon sa Philippine Veterans Bank angot sa planong ₱550 milyong loan it lokal nga gobyerno it Aklan.
Raya ro ginkumpirma ni First District Board Member Apolinar Cleope.
Suno kana nga nakataeana ro ginaplano nga loan para sa pagpatapos sa construction it first floor it Malay District Hospital nga may pondong ₱150 milyon kamana man sa Ibajay District Hospital nga may ₱250 milyon; rehabilitasyon ag pagkumpuni it Caticlan ag Cagban Jetty Port Terminals nga masyado eon sigon nga “long overdue,” ag ro pagbakae it sang ektaryang lote sa Barangay Bugasongan, Lezo para sa planong pagpatindog it district hospital sa nasambit nga lugar.
Ginklaru ni SP Cleope nga ro gintau nga authorization it provincial board hay unang tikang pa eamang it proseso.
Tuyo kara nga taw-an it gahum ro gobernador nga makipag-istorya ag makipagnegosasyon sa nasambit nga banko ag owa pa it kasiguraduhan kon maaprubahan ro aplikasyon.
Samtang, nagdesisyun sigon nga mag-utang para sa nasambit nga mga proyekto bangud nga indi raya masarangan nga gastusan it pondo halin sa regular nga annual budget it probinsiya.
