BORACAY, Island — Daywang bronze medal ro nakuhit it mga Pilipinong swimmers sa pagtapos it 4th Southeast Asia Open Water Championships nga ginpatigayon sa Boracay Newcoast, adlaw it dominggo.
Nakaangkon it bronze medal si Jie Angela Mikaela Talosig sa women’s 20-and-above division matapos maglista it oras nga 1 hour, 18 minutes ag 57 seconds.
Raya eon ro anang international debut sa open water competition.
Nakakuhit man it bronze medal si Julia Jewels Pobleto sa girls’ 12-13 3K event matapos makapalista it 50 minutes ag 40 seconds.
Ro tatlong adlaw nga kompetisyon hay ginpatigayon it Philippine Sports Commission ag Philippine Aquatics Inc. kamana man sanctioned it Southeast Asian Swimming Federation.
Nasayuran nga ginpasakupan it masobra sa 100 nga swimmers halin sa Pilipinas, Indonesia, Singapore, Thailand ag Vietnam ro nasambit nga swimming competition.
Kabulig sa nagsikyar sa seguridad ro mga lifeguard, Philippine Coast Guard ag Philippine National Police, kaibahan ro mga lokal nga gobyerno it Aklan ag Malay.
Raya man ro unang kahigayunan nga nag-host ro Pilipinas it nasambit nga regional open water swimming championships.
