KALIBO, Aklan — Bukas eon ro cruise lounge sa isla it Boracay nga pwedeng gamiton it mga bisita it cruise ship samtang nagahueat sa andang schedule sa paglibot sa isla.
Suno kay Niven Maquirang, Executive Assistant sa Office of the Provincial Governor ag Officer-in-Charge it Cruise Ship Operations, tatlo pang cruise ship ro ginaeauman nga magadungka sa Boracay bago matapos ro 2026.
Kaibahan kara ro MS The World nga nakataeanang magapabilin it overnight sa isla sa Nobyembre 23, ro Norwegian Jewel sa Disyembre 12, ag sambilog pang cruise ship sa Disyembre 26.
Daywa sa maga-abot nga barko ro ginaeauman nga magapatigayon it andang maiden call ukon unang pagbisita sa Boracay.
Madumduman nga nagdungka sa isla ko Oktubre 26 ro MS Costa Serena para sa maiden call kara nga may daeang masobra sa 3,000 nga bisita.
Ginaboeobanta nga 60 hasta 70 porsiyento sa mga raya hay halin sa Europa.
Nakaaangkon sigon it pagbaeayluhan it mga plake bilang kaparte it pagbaton sa barko.
Dugang pa ni Maquirang, owa it nailistang untoward incident sa mga bisita samtang sa isla ro mga raya.
