Kalibo Aklan —— Ginpromisa it batang doktor nga si Carmina Fuentebella nga uman imaw nga magabalik sa pagiging frontliner sa oras nga eubusan eon nga magmayad sa coronavirus disease (COVID-19).
Nasayuran nga si Dr. Fuentebella hay may dugong akeanon ag unga ni Engr Noel Fuentebella, District Engineer it Department of Public Works and Highways (DPWH-Aklan).
Sa anang post sa social media, ginpahayag it resident doktor it University of Santo Tomas Hospital nga ro anang pagmayad sa sakit ro pinaka-manami nga regalo nga anang nabaton sa anang ika-27th birthday ko nagtaliwan nga Abril 24 .
Nasayuran nga na-intubate imaw ag nakabaton it plasma treatment sa katung-anan it anang pakikipagsukoe sa sakit .
Aminado pa raya nga ginkoebaan man imaw sa posibilidad nga raya eon ro anang katapusan.
Apang bangud sigon sa pagtinguha it mga doctors ag nurses ag pangamuyo it mga nakapalibot kana hay naeampasan nana ro makamaeatay nga sakit .
Angot kara, gin-engganyo nana ro anang mga kapareehong frontliners nga maging mabakod ag padayun ro pagsukoe kontra sa COVID-19.
Mabahoe man ro anang pagpasaeamat bangud nga maabu ro tawo nga nalipay sa anang pagmayad sa sakit.
Madumduman nga nauna eon nga nagpanawagan it pangamuyo ro anang mga kaibahan sa trabaho matapos nga naging kritikal ro anang kahimtangan matapos nga matapnan it COVID-19.
Base sa datus it Department of Health, 19 sa 26 nga healthcare workers nga namatay sa COVID-19 sa pilipinas hay mga doctor .
Masobra sa 1,000 eon nga medical frontliners ro na-infect it virus.
