KALIBO, Aklan—Nagapati si 2nd district sangguniang panlalawigan member Jay Tejada nga indi eon kinahangean nga magpaguwa it executive order si Aklan governor Joen Miraflores angot sa paghaeuga sa paggamit it face mask sa guwa ukon outdoors.
Suno kana nga klaru man ro mga nakabaehag sa EO No. 3 ni President Ferdinand “Bongbong” Marcos Jr. sa optional nga paggamit it mask outdoors ag iba pang guidelines nga ginproponer it Inter-Agency Task Force for the Management of Emerging Infectious Diseases ukon IATF-EID.
Pwede man suno kana raya nga mapatuman sa bilog nga nasyon maskin nga owa it nagakaigo nga local legislations.
Sa pihak nga parte, suportado ni sp Tejada ro paghaeuga ukon optional nga paggamit it facemask bangud nga mag-eowas nga magastos hay disturbo raya kon amat sa pagtrabaho it sangka indibidwal.
Nagaeaum imaw nga ro nasambit nga tikang hay makapabaskog sa economic activities ukon amat-amat nga pagbalik sa normal it tanan.
Ssa pihak nga parte, padayun man ro pag engganyo it opisyal sa tanan nga aklanon nga seryosohon ro pagpa-booster shots agud nga maskin nga indi eon magsuksok it face mask hay makaangkon it dugang nga proteksyon kontra sa covid 19.
Base sa record suno kana hay medyu manaba ro numero it mga nagapaturok it booster sa probinsiya sa pihak nga sambilog ro aklan sa nagapanguna sa may fully vaccinated nga target population.
