Kalibo Aklan ———–Nakalista it sambilog nga namatay sa probinsya it Aklan bangud sa rabies.
Base sa datos, kapin sa 2,220 ro nailistang kaso it mga naangkit it ayam sa bilog nga probinsya sa unang quarter makarun nga dag-on ukon umpisa Enero hasta Marso.
Suno kay Ms. Debbie Villaflor, Nurse IV ag Rabies Program Provincial Coordinator sa probinsya it Aklan nga ro namatay nga pasyente hay maghalin sa banwa it Kalibo ag naangkit it sangka ayam nga bang-aw.
Ginapahayag nga ro nasambitan nga persona hay owa eagi nagpakonsulta sa doktor ag gindaea-daea eamang ro anang nabatyagan nga sakit.
Ko ulihi hay nagpatan-aw eun raya sa ospital ag dikato hay nasayuran nga may history ro pasyente it pagkaangkit it ayam apang naging grabe eun ro komplikasyon it virus sa anang kaeawasan.
Madumduman nga ko nagtaliwan nga dag-on hay nakalista ro probinsya it limang ka mga pasyente nga namatay bangud sa rabies nga maghalin sa banwa it Nabas, Kalibo , New Washington, Balete ag Libacao.
May kaangtan kara, uman nga nagpadumdom si Villaflor sa publiko nga may unang mga animal bite center sa probinsya kun sa siin nagatao raya it libreng bakuna para sa mga persona nga na-angkit it mga sapat nga infected it rabies partikular eun ro ayam.
Kinahangean eamang sigon nga mag-adto sa pampublikong animal bite center kung maangkit it sapat nga posibleng may rabies agud nga maturukan it bakuna ag mapaeayo sa peligro.
