KALIBO, Aklan — Ginpasiguro ni Boracay Inter-Agency Task Force (BIATF) nga magahimo it nagakaigo nga tikang matapos nga ipapundo it Aklan Regional Trial Court (RTC) ro demolisyon sa 10 nga edipisyo sa beachfront sa Sitio Bulabog, Brgy. Balabag sa isla it Boracay.
Sa interview it Bombo Radyo, ginpahayag ni Boracay Inter-Agency Rehabilitation Management Group General Manager Natividad Berdandino nga dismayado sanda bangud nga owa gin-eakip ro task force sa apela it nasambit nga mga establishment owners sa korte.
Ginbatikos man kara ro lokal nga gobyerno it Malay bangud sa medyu pagpabor sa mga nagapanag-iya it edipisyo .
Sa masobra sa 300 sigon nga ginpadaehan it demolition order, ro 10 eang ro owa pa nakasunod haeos maga sang dag-on eon sa Oktubre 26.
Sa ginpaguwa nga daywang panig nga temporary restraining order (TRO) nga may petsang October 15 ni Aklan RTC Branch 7 acting presiding judge Ronald Exmundo, ginmanduan kara ro LGU-Malay sa pagpanguna ni acting Malay Mayor Frolibar Bautista nga temporaryong ipapundo ro demolisyon sa mga edipisyo nga ginapanag-iyahan it Aira Hotel, Ventoso Residences, Freestyle Academy Kite Surfing School, Kite Center at Banana Bay, Wind Riders Inn, Pahuwayan Suites, Boracay Gems, Unit 101 ag 107 it 7 Stones Boracay Suites ag Lumbung Residences.
Ro TRO hay epektibo 20 diyas matapos raya nga ginpaguwa it korte.
Base sa ginapatuman nga layi ag patakaran sa isla, ro mga edipisyo hay dapat nga may 30 meters ro kaeayu-on halin sa bibi it baybay.
