KALIBO, Aklan—Ginakabig nga great struggle ni Atty. Andrei Jiminez, sambilog sa mga Aklanon nga nakapasar sa 2019 Bar Examination ro mga kalisod nana nga gin-agyan antes makapasar sa nasambit nga eksaminasyon.
Suno kay Atty. Jiminez nga naging mabahoe nga hangkat para kana ro pagbutaw it temprano ko mga tyempo nga naga-iskuyla ag naga-review pa eamang imaw kamana man ro pagsakripisyo nga indi makasunod sa mga importanteng pagtililipon it anang pamilya ag iba pang mahae sa kabuhi para eang tutukan ro pagtuon.
Angot kara, eubos sigon ro anang kalipay nga nabatyagan kat masayuran nga nakaibahan imaw sa kapin sa 2,103 nga mga nakapasar sa nasambit nga eksaminasyon kung sa siin 7, 685 ro kabilugan nga BAR examinees.
Ginpahayag dugang ni Atty. Jiminez nga antes imaw nakapagtapos hay naging working students anay imaw apang sa pagtungtong nana it ikatlong dag-on sa pagtuon it abogasiya hay nagdesidir imaw nga maghalin sa trabaho para tutukan ro anang pag-iskuyla.
Bangud man sa kahugod ag pagpanikasog it anang mga ginikanan nga imaw hay makatapos it pagtuon hay naging madinaeag-on sa anang karera bilang abogado si Jiminez.
Ginpakigbahin man kara nga sobrang naging proud ro anang mga ginikanan ag himata kasunod it anang pagkapasar bangud sa imaw sigon ro kauna-unahang naging abogado sa andang pamilya.
Si Atty. Jiminez hay gin-unga sa Bulacan apang ro anang ina hay tumandok it Brgy. Poblacion, Numancia.
Si Atty. Jiminez hay nagbuoe it pre-law course nga Bachelor of Science in Accountancy (BS Accountancy) sa University of Sto. Thomas sa Manila ag nagtuon dugang it Doctor Degree sa San Beda College of Law.
