KALIBO, Aklan —– Naga-eotaw pa sa kalipay ro 23-anyos nga Aklanon beauty queen turned athlete sa naangkon nga bronze medal sa pencak silat competition it 2018 Asian Games sa Jakarta, Indonesia.
Sa interview it Bombo Radyo, ginpahayag ni Cherry May Regalado it Barangay Pook, Kalibo, Aklan nga buong puso raya nga naghampang agud makadungan sa mga mayad nga player it nagkaeain-eain nga koponan.
Pilang puntos eamang sigon ro naging abante it Indonesia ag Singapore nga nakaangkon it gold ag silver medals.
Aminado si Regalado nga sulit ro anang gaoy ag sakripisyo sa ginhimong training bangud pila eamang sa masobra sa 200 nga mga atleta it Pilipinas ro nakabueo it medalya.
Nasayuran nga sambilog si Regalado sa mga atletang ginpadaea sa Pencak Silat World Championship sa Bali, Indonesia ko nagtaliwan nga dag-on nga naging daean para pasugtan raya it Philippine Sports Commission (PSC) nga makaibahan sa magiging representante it Pilipinas sa Asian Games.
Sa pihak kara, dismayado si Regalado sa kakueangan sigon it suporta it gobyerno kapin eon sa andang mga kinahang-eanon sa training.
