KALIBO, Aklan — Nagkalipay ro provincial government sa naangkong bronze medal it sangka Aklanon Paralympic swimmer halin sa Ibajay, Aklan sa nagapadayon nga 9th ASEAN Para Games sa Malaysia.
Nagpangatlo si Claire Sunega Calizo nga nakarehistro it sangka minuto ag 14.04 segundo sa 100 meter freestyle women S14, kon siin nagpanguna kara ro Indonesia sa oras nga 1:05.15 ag ginsundan it Singapore nga may 1:07.20.
Presenteng naga-eskwela ro 18-anyos nga si Calizo sa Kalibo Integrated Special Education Center (KISEC) sa Kalibo.
Antes nagsabak sa ASEAN Para Games, nagdaog imaw it gold medals sa 50m backstroke ag 50m freestyle sa 2017 Palarong Pambansa Paralympics.
Kaibahan ni Calizo sa swimming event ro sambilog pang Aklanon nga si Edwin Villanueva it Malay, Aklan nga 4th place sa 50m breastroke SB7.
Ro Para Games hay nag-umpisa ko Setyembre 17 hasta it 23 nga may tema makarong dag-on nga “Rising Together”.
