KALIBO, Aklan — Indi makalipatan it mga atletang Aklanon ro sangka hitabu sa andang kabuhi matapos nga maka-ibahan nanda ro kauna-unahang Pinoy Olympic champion nga si Hidilyn Diaz sa Laog, Ilocos Norte antes ro nakataeanang pagpasakop sa Palarong Pambansa 2025.
Suno kay athletic coach Jovie Ote nga nakipag-angot imaw mismo kay Diaz antes ro andang pagbiyahe paagto sa Laoag agud nga mataw-an it pilang tips ro mga na-qualify nga Aklanon weightlifters nga puro bagito sa nasambit nga klase it sports.
Dugang pa nga maskin mga bagito hay nakitaan sigon it potential ni Diaz ro nasambit nga mga atleta nga puro naghalin sa banwa it New Washington.
Gintinguhaan sigon nana nga makaangkon it kahigayunan nga maka-ibahan it anang mga weightlifter si Diaz bangud nga raya hay sangka mayad nga halimbawa ag inspirasyon para kanda nga mga pamatan-on nga atleta.
Ginpasaeamatan sigon nana si Diaz sa pakikipagbahin kara it pilang pointers sa mga Aklanon athletes nga kabay nga magaserbing leksyon agud nga mas pa nga makaangkon it mabahoe nga handum.
Ro journey sigon ni Diaz sa patag it weightlifting hay nakatau it inspirasyon sa tanan.
Nasayuran nga ro 33-anyos nga tubong Zamboanga City ro nagaserbi makaron nga tournament director it weightlifting matapos nga sa kauna-unahan nga kahigayunan hay nakasueod raya sa makaron nga edisyon it Palarong Pambansa bilang demo sports.
Sa pihak nga parte, gindugang pa ni Ote nga mabahoe nga adjustment ro andang ginahimo makaron sa tunga it ginapatigayon nga training bangud sa naeksperyensiyahan nga grabeng init it paniempo sa Laoag nga kon amat hay naga-abot sa 42 degrees celcius ro heat index.
Mag-eowas kara, owa eon sanda it iba pang na-encounter nga problema bangud sa maayos nga billeting area sa San Nicolas National High School.
