KALIBO, Aklan–Ap-at nga miyembro it sangka pamilya ro na-food poison matapos nga makakaon it gintuea nga ligbos ukon mushroom nga gin-harvest it andang padre de pamilya sa kasagingan sa nalikod nga parte it andang baeay sa Brgy. Linabuan Norte, Kalibo.
Ro mga biktima hay ginaeakipan it 44 anyos nga ina ag tatlong unga nga naga-edad it 24, 19 ag 11 anyos.
Una eon sa maayos nga kahimtangan ro ap-at nga biktima matapos nga mataw-an it nagakaigo nga medikasyon sa Aklan provincial hospital .
Ginasugid nga ro mga pasyente hay naka-eksperyensiya it pagpaeanuka, pagsakit it tiyan ag pagpang-euya it eawas matapos nga magkaon it ligbos rason nga insigidang gindaea sa ospital .
Gin-eamhay sigon sa tinuea ro ligbos ag ginpamahaw it bilog nga pamilya.
Suno kay punong barangay Nelson Repiedad nga posibleng owa ginaeauman it pamilya nga makahieilo ro nabo-oe nanda nga ligbos nga gin-eamhayan it tinuea.
Padumdum nana nga magdahan sa pagbo-oe it mga ligbos ag usisaon it mayad agud nga malikawan nga madisgrasya.
Nasayuran nga bag-o eamang nga nakasaylo ro pamilya sa nasambit nga lugar.
