KALIBO, Aklan — Arestado ro sangka 34-anyos nga babaye sa ginpatigayon nga operasyon it Aklan Provincial Intelligence Unit ag New Washington Municipal Police Station kontra sa iligal nga sugae sa New Washington, Aklan, hapon it Biyernes.
Ginkilaea ro suspek kay alyas “Albie,” nga nadakpan sa akto nga nagapataya it iligal nga “bookies,” sangka klase it sugae nga nagagamit it sistemang kapareho it Small Town Lottery (STL) apang owa it nagakaigo nga lisensya ukon permit halin sa gobyerno.
Nakumpiska sa operasyon ro sangka ₱100 marked money, mga listahan it tayaan ukon “cotejo,” cover book, mga ballpen, daywang pouch, ag kabilugan nga ₱1,197 nga ginadudahan nga koleksyon halin sa pagpataya.
Ginkustodiya it New Washington Municipal Police Station ro suspek samtang ginpahaum ro ginpasaka nga nagakaigo nga kaso bangud sa pageabag sa Presidential Decree No. 9278.
