KALIBO, Aklan—Sigidas eon ro ginahimo nga preparasyon it Bacan National High School para sa nagahilapit nga pagbukas it School Year 2022-2023 makaron nga buean it Agosto.
Suno kay Judith Moriente Obrique, School Principal I it Bacan National High School nga haum eon sanda nga mag-implementar it in-person classes bangud naumpisahan eon nanda raya ko nagtaliwan nga school year matapos nga maeakip ro andang eskwelahan sa ginpasugtan it Department of Education (DepEd).
Apang, limitado eamang sigon sa Grade 7, 11 ag 12 ro andang ginbuksan.
Engkaso nga madayun ro pagpatuman it full implementation it face-to-face classes sa Nobyembre, kinahang-ean nanda nga paeaparon ro preparasyon.
Pila sa mga dapat nanda nga tutukan hay ro pag-angkon it bastante nga classrom, dishwashing area ag alcohol dispenser para masunod ro health protocols bangud nagapabilin gihapon ro paeag it COVID-19 pandemic.
Sa pihak nga parte, plano ni Obrique nga talakayon sa andang pagahiwaton nga General Assembly kaibahan ro mga ginikanan ro may kaangtanan sa DepEd order nga indi eon kinahang-ean nga magsuksok it school uniform ro mga estudyante.
Iga-orient sigon nanda ro mga ginikanan angot sa bentaha ag dis-bentaha it pagsuksok it uniform.
Aminado man raya nga malisod magtumod it mga estudyante kung owa sanda nakasuksok it uniporme it eskwelahan.
Mas makatipid suno kana ro mga ginikanan sa pagbakae it eambong kung may school uniform kamana man nga magiging disiplinado pa ro mga unga.
