KALIBO, Aklan—Naging makahawat-hawat ro kompetisyon sa bag-o eamang natapos nga Palarong Pambansa 2024 sa Cebu City.
Suno kay coach Jovie Ote it athletics nga naging hugut ro hinampang sa makaron nga edisyon it national sporting event bangud sa energy performances nga ginpakita it mga atleta halin sa nagkaeain-eain nga mga rehiyon.
Owa man suno kana nagpa-uli ro mga atleta maghalin sa Aklan bangud nga daywa sa mga raya hay naka-amot it medalya.
Sambilog eon kara si John Alex Yu it New Washington nga sambilog sa mga nakaangkon it gold sa 4 by 100 meter relay ag si Neo Sarabia it banwa man it New Washington nga nakabo-oe it silver sa shot put.
Ginpahayag dugang nga sa sueod it ap-at nga adlaw nga hinampang hay ginpakita it mga student atletes ro andang tumaeagsahon nga skills ag determinasyon para sa nagkaeain-eain nga sports disciplines.
Nag-compete sigon ro mga raya bukon eamang sa medalya kundi nga makaangkon it bag-ong records sa andang natungdan nga mga sports.
Nakaangkon sigon it isyu ro track oval it Cebu City sports complex nga kueang it 0.88-meter sa standard nga 400m rason nga gin-nullify ro mga bag-o kunta nga nahimo nga records sa athletics kapareho it naangkon kunta it Western Visayas sa 4 by 100 meter relay.
Naka apekto sigon raya sa mga atleta nga ro nagapangunang handum sa pagsabak sa hinampang hay maka set it bag-ong record.
Sa pihak nga parte, ginkumpirma ni coach Ote nga nakabiyahe eon pauli ro mga atleta it Western Visayas kaina it aga-aga sakay it roro vessel via Negros Occidental.
Nasayuran nga sa makaron nga palarong pambansa, nagpanguna gihapon ro National Capital Region, nagapangaywa ro CALABARZON pinaagi sa sambilog nga gold medal nga abanse nagapangatlo naton nga Western Visayas.
