KALIBO, Aklan — Nakataeana nga magapasa it kandidatura si Banga mayor Noel “Boy” Redison nga sa ikaywang kahigayunan hay magapadaeagan bilang alkalde it nasambit nga banwa.
Suno kana nga makaangkon imaw it bag-ong ka tandem sa pagkatawo ni Sangguniang Bayan member Stanley Macahilig .
Makaibahan nanda sa andang line-up bilang mga konsehal sanday incumbent SB members Rubin Seraspi, Nonong Fernandez, ag Larry Maming, kamana man si dating punong barangay Em Masangya, Mai-Mai Fuentes, Papa Lando, ag Abby Pastrana.
Samtang, suno kana nga gusto nana nga padayunon ro anang mga naumpisahan nga proyekto ag programa eabi eon sa mga pumueuyu nga nagakinahangean it bulig.
Pahayag pa it alkalde nga owa it kamatuoran ro mga espekulasyon nga imaw hay suplado.
Sa kamatuoran suno kana hay mas gusto pa nana nga buligan ro mga owa nagsuporta kana ko nagtaliwan nga eleksyon agud nga maipakita nga patas ro anang pagtrato sa tanan ag owa imaw it ginapili.
Dugang pa nga puro pagpanamad eamang ro mga nagakalhit nga balita nga maabu imaw nga ginpahalin nga mga job orders sa munisipyo eabi eon ro mga gina-alegar nga ginpasueod ni Vice Mayor Erlinda Maming.
Sa pihak nga parte, ro nagabalik sa pulitika nga si dating Banga mayor Antong Maming ro napabalitang hugut nga makaengkwentru nana sa maabot nga eleksyon.
