Kalibo Aklan ——Bangud sa “challenge” it anang barkada, viral makarun sa social media ro sangka myembro it LGBTQ+ community.
Kasunod raya it na-eksperyensiyahan nga kaboringon bangud sa gihapon sa ginapatuman nga Community Quarantine sa tunga it paeag it coronavirus disease (COVID-19).
Nag-resulta it nagkaeain eain nga reaksyon ro facebook post ni Renz Alex Dailisan maghalin sa banwa it Ibajay kung sa siin makit-an ro anang mga suksok nga gown hay himo eamang sa mga bagay-bagay nga makit-an sa palibot.
Gintawag pa raya it ibang mga netizen nga quarantine fashion.
Samtang sa interview it Bombo Radyo ginpahayag ni Dailisan nga tuyo karang magtao it kalipay sa ibang tawo pamaagi sa anang kakaibang inisyatibo.
Importante man suno pa kana nga maging masadya makarun sa tunga it pademya.
Nasayuran nga na-feature man sa ibang National Television ro Proud Aklanon nga si Dailisan matapos nga gamiton nga disenyo sa anang eawas ro mga li-ay , bunot, payaw, uhot, nito, fish net, eapok, ag maabo pang iba.
