KALIBO, Aklan—Bukas ro barangay council it Poblacion, Kalibo sa mga aplikante nga gustong pun-an ro ginbakanteng pwesto ni dating barangay kagawad Mary Michelle Sy nga nag-resign sa pwesto may daywang domingo eon ro nagtaliwan.
Suno kay punong barangay Neil Candelario nga nag-post eon sanda it nasambit nga vacancy sa pilang mga pili nga lugar.
Para sa mga interesado, magpadaea eamang sigon it letter of intent agud pagapilian it mga miyembro it konseho.
Nagdihon it anang resignation letter si dating kagawad Sy sa taeatapan ni punong barangay Candelario nga insigidang ginpadaea sa taeatapan ni Kalibo mayor Juris Sucro.
Kadungan sa pagbaton it alkalde, gindeklara nga bakante ro anang gin-aywan nga pungkuan it nasambit nga dating kagawad.
Owa sigon personal nga gintau ni Sy ro anang sueat kundi nga naggamit raya it emisaryo.
Apang ko ulihi hay nagpadaea it video message para sa kumpirmasyon .
Gintumod sigon it dating opisyal nga bangud sa personal nga rason kon ham-an nga imaw hay nagresign.
Antes kara, haeos tatlong beses eon man imaw nga absent without leave sa andang mga session nga sangka ground para sa suspension ukon dismissal.
Hasta makaron nga adlaw it Martes, ro deadline sa pagbaton it letter of intent sa mga gustong mag apply.
Kapin sa tatlo eon suno kana ro andang ginabuytan nga aplikante nga pwedeng pagapilian.
