Na-trauma ro sangka barangay treasurer matapos nga nasaksihan ro brutal nga pagbuno sa sangka eaeaki sa sueod mismo it andang barangay hall, bandang alas-9:30 it agahon it Miyerkules, Hunyo 12 sa Barangay Bulabud, Malinao.
Ginsaysay ni barangay treasurer Angelyn Arnesto nga maskin nga holiday sa pagdumdum it “Araw ng Kalayaan “ hay nagbalik imaw sa barangay hall bangud nga may taeapuson imaw nga report.
May ginhatud eamang sigon nga pasahero ro biktimang si Sherwin Retiro, sa legal nga edad ag residente it Barangay Rosario, Malinao sa nasambit nga lugar kat maagyan nana nga bukas ro barangay hall rason nga nagsueod agud nga ipaabot ro anang concern nga owa pa nakabayad ro suspek nga si Dandy Opeñano, 39-anyos ag residente it nasambit nga barangay angot sa andang ginapangayo nga danyos perwisyos nga P2,000 sa pagbayo sa anang unga nga eaeaki nga tinamaan sa anang kilay.// owa sigon imaw nagahuna-huna nga matabu ro insidente.
Matapos ro insidente hay owa haeos imaw nga nakatueugan ag nagabalik-balik sa anang isip ro natabu nga mas pang nadugangan ro nerbiyos sa pag-review sa andang CCTV footage kun sa siin nakita kon makapilang beses nga ginbuno it suspek ro biktima.
Owa sigon sanda it maeain nga intensyon nga ginpa-agtunan ro tiya it suspek nga sambilog man sa andang kagawad, kun sa siin natiempo nga nabatian kara ro pagsukot kana it biktima nga anang ginkaakig rason nga nag-uli sa andang baeay ag nagbo-oe it kutsilyo ag dayun nga gin-atake si Retiro sa barangay hall samtang nga nakatalikod.
Sa pihak nga parte, ginklaru man ni punong barangay Rosario Dela cruz it Bulabud, Malinao nga owa it naka-schedule nga settlement ro daywa kahapon nga adlaw bangud nga holiday.
Owa man sigon imaw it duty kaibahan ro iba pa nanda nga mga barangay tanod.
Maskin sigon imaw hay nakibot kat masayuran nga may stubbing incident nga natabu sa sueod it andang barangay hall.
Ko nagtaliwan nga Mayo 26 hay nag-atubang sigon ro magtimbang nga parte sa barangay hall para sa sangka settlement matapos nga ginbayo it suspek ro unga it biktima may daywang domingo eon ro nagtaliwan.
Nadakpan sigon sa akto it suspek ro anang 15 anyos nga unga nga babaye nga kaibahan ro unga nga eaeaki it biktima sa dis-oras it gabi-i sa madueom nga parte it andang eskwelahan nga sa sobrang kaakig hay nabayo nana.
Ginpabueong it biktima ro anang unga kun sa siin nag abot sa P2,283 ro andang nagastos.
Ginsabat sigon nanda it sambilog sa anang kagawad ro sawad nga 283 pesos kun sa siin ginpromisa it suspek nga pagabayaran ro balanse pag-abot it kwarta halin sa 4Ps ko Hunyo 9.
Ginasugid nga owa nabayaran ro biktima rason nga nag-follow-up imaw kat maagyan nga bukas ro andang barangay hall.
