KALIBO, Aklan—Magadihon it petisyon sa Korte Suprema ro grupo it Bayan Muna kontra sa kakapasa eamang nga Anti-Terrorism Act of 2020 nga ko nagtaliwan eamang nga adlaw ginpirmahan ni Pangueong Rodrigo Duterte ag epektibo 15 diyas halin kat ginpublish sa official gazette it gobyerno.
Suno kay Bayan Muna Representative Carlos Isagani Zarate, sa adlaw it Lunes hay magadihon sanda it petisyon bangud sa ginapatihan nga ro Anti-Terrorism Act hay may mga probisyon nga bukon it makaturangan, bukon it makabaeaton ag peligroso sa constitutional rights it kada pumueoyo kamana man posible nga maeabag ag maabuso ro 1987 constitution.
Suno pa kay Zarate, bukon eon it makaki-iebot nga ginpirmahan it presidente ro Anti-Terror Bill nga naging laye ko ulihi bangud nga ana pa raya nga gincertify as urgent ag uwa it ginpatigayon nga deliberasyon.
Sa tunga sigon it nagapadayon nga paeag it pandemya hay bukon it raya ro ginaeauman nanda nga maging solusyon it presidente.
Ro ginatinguhaan nga matalakay nga economic bills nga magata-o it sabat sa problema it nasyon sa ekonomiya, kawad-an it trabaho ag pagsarado it mga negosyo hay uwa gid nahueag hasta nga nag sine die adjournment ro Kamara ag Senado.
Ginpaathag pa ni Zarate nga kon problema sa terorismo hay may laye eon kaangot karon ag raya hay ro Human Security Act of 2007.
Suno pa kana nga “very broad” ro definition it laye ag bukon it raya ro sabat sa krisis nga ginapangatubang it nasyon rason nga hugot nandang ginakwestyon ro ligalidad it nasambit nga laye.
