Madinaeag-on nga nakabalik ro Imahe it Jesus Nazareno sa Minor Basilica ag National Shrine of Jesus Nazareno ukon Quiapo Church.
Suno kay Truly Flaviano Jr, presidente it Senior Zyrene de Aklan-Aklan Chapter nga bandang ala-1:26 kaina it aga-aga kat eksaktong nakasueod ro imahe it Hesus Nazareno sa Minor Basilica matapos ro masobra sa 20 oras nga traslacion it andas halin sa Quirino Grandstand.
Ginpahayag dugang nga inde mahueogan it dagom ro ginatanya nga masobra sa waeong milyon nga mga deboto ro nagsunod ag nagtambong sa dag-unan nga traslacion.
Kaparehas sa kada dag-on nga nagakatabo, inde malikawan ro dueotdutan it mga tawo sa pagtinguha nga makapaeapit sa andas kon sa siin makapilang beses nga nabugto ro eubid nga nagadepensa sa andas rason nga masyadong mahinay ro daeagan it andas.
Maskin imaw suno kana hay uwa nakalikaw sa aksidente bangud sa anang pagkahueog sa andas nga nagresulta sa anang pagkahilo.
Apang, eubus gihapon ro anang pagpasaeamat sa Poong Hesus Nazareno bangud sa gin-eowas imaw sa kataeagman.
Ginpahayag dugang nga base suno kana sa pahayag it pamunuan it Quiapo Church, mas mabahoe ro nadugang nga numero it mga deboto makaron nga dag-on kon igakumpara ko nagtaliwan nga dag-on.
Nasayuran nga raya ro unang pagselebrar halin kat gindeklara bilang “national feast” sa tanan nga dioceses sa nasyon ro kapiyestahan it Hesus Nazareno.
