KALIBO, Aklan — Kaibahan sa TOP 15 it pinakamanami nga white sand beaches sa bilog nga kalibutan makaron nga 2024 ro Isla it Boracay rason nga paraiso raya kon kabigon it kaabuan.
Suno sa sikat nga lifestyle magazine sa Amerika nga Veranda Magazine, indi maitago nga maabu ro na-engganyo nga mag-agto sa isla bangud nga may season raya para sa tanan.
Pwede sigon nga ma-enjoy sa Boracay ro nightlife hopping umpisa Disyembre hasta Mayo, ag may summer ag fall months para sa mga gusto ro matawhay ag mahipos nga paniempo.
Mag-eowas kara, ginadayo man ro mga panami nga taean-awon sa lugar kamana man ro masyadong maputi ag mapino kara nga baeas.
Rason nga kaibahan raya sa ginpaguwa nga listahan kan-o eamang it Top 15 Most Beautiful White Sand Beaches Around the World.
Mag-eowas sa Boracay nga pang-6 nga pwesto, nakasueod man sa listahan ro Shoal Bay Anguilla sa Carribean nga top 1 , ginsundan it Gran Anse sa La Digue, Seychelles East Africa; Whitehaven sa Whitsunday, Australia; La Cinta sa Sardinia, Italy; Goose Rocks sa Kennebunkport, Maine, USA ag Playa de Paraiso sa Tulum, Mexico.
Kamana man ro Boulders sa Simon’s Town, South Africa; Grace Bay sa Providenciales, Turks and Caicos Islands; Clearwater sa Florida, USA; Ksamil sa Albania; Matira sa Bora-Bora, French Polynesia; Trunk Bay sa St. John, US Virgin Islands; Ipanema sa Rio de Janeiro, Brazil; ag Kauna’oa Bay sa Kohala Coast, Hawaii.
