KALIBO, Aklan—Uman nga nagpanawagan ro Bureau of Fire Protection ukon BFP sa publiko nga magdahan agud nga makalikaw sa sunog.
Raya hay kasunod it kambal nga sunog nga nag-eontad ko Sabado nga adlaw sa banwa it Ibajay.
Suno kay FO2 Christian John Calzado, arson investigator it BFP-Ibajay nga dapat nga ibutang sa isip adlaw-adlaw it mga residente ro “Fire Prevention” agud nga malikawan ro mga sunog sa andang mga lugar.
Suno kana nga agud nga makalikaw sa sunog ag masiguro ro kaeowasan, pirmeng i-check ro linya it kuryente, likawan ro octopus connection, i- unplug ro mga de kuryenteng kagamitan kon owa ginagamit, i– check ro hose it LPG, likawan nga magsigarilyo sa sueod it baeay eabi eon kon hilong, patyon ro nasindihang kandila antes nga matueog ag indi pag-aywan ro baeay kon may gina-eaha ag iba pa.
Madumduman nga bandang ala-1:30 ko Sabado, sangka sunog ro nag-eontad sa baeay ni Maritess Albino sa Sitio Nasunugan, Brgy. San Jose, Ibajay.
Ginasugid nga napabay-an nga ginaeaha nga gutaw sa dapog ro posibleng rason it sunog.
Samtang naga eaha suno kana hay gintawag imaw it anang kaeapit-baeay matapos nga magtawag ro anang unga halin sa Numancia.
Gin-gatungan sigon nana it maabu nga karton ro gin-eaha nga posibleng nag-makot sa dingding nga himo sa amakan ag sumaka sa nakatambak nga kahoy sa ibabaw it dapog.
Kapin sa P50,000 ro danyos sa sunog.
Sa pihak nga parte, bag-o eamang sigon nga nakabalik sanda sa estasyon kat uman nga nakaangkon it fire call bandang alas-5:30 it hapon sa sunog nga natabu sa Sta. Rita St. Brgy. Poblacion.
Naga-abot sa P500,000 ro kahalitan sa pagka-ugdaw it ancestral house ag P250,000 sa kaiping nga baeay nga nadaeahig sa insidente.
Ro ancestral house hay ginapanag-iyahan ni Antonio Magpusao.
Ginpasaka sigon nanda sa ikaywang alarma ro sunog bangud sa dukot-dukot nga baeay kun sa siin gin respondehan it mga fire station sa kaiping nga banwa.
Sangka 66 anyos nga lola ro gin-rescue matapos nga ma-trap sa nagakasunog nga baeay.
Nag-angkon raya it paso sa alima, waea nga tuhod ag iba pang parte it eawas.
Gin-check man ro anang lungs bangud sa posibleng pagkahanggop it peligrosong asu.
Ginapatihan nga posibleng sa linya it nakasaksak nga refrigerator naghalin ro kaeayo.
Samtang, ginpahayag ni FO2 Calzado nga ro sunud-sunod nga insidente it sunog hay padayun pa nga gina-imbestigahan.
