KALIBO, Aklan–Sa pihak nga gina-ubo, apang preparado eon ro sangka chess player halin sa Aklan nga kaibahan sa pambato it Western Visayas sa pagsabak sa Palarong Pambansa makaron nga dag-on sa Cebu City.
Suno kay Mrs. Carmel Bulaclac, ina it chess player nga si Clarence Bulaclac sa elementary division nga bangud sa kondisyon it anang unga hay ginpakamayad nana nga i-pull-out raya halin sa andang billeting area sa Guadalupe Elementary School sa V. Rama Avenue sa Cebu City ag ginpa-istar sa sangka hotel .
Gusto man sigon nana nga maka-focus mentally ro anang unga para sa tournament nga maga-umpisa sa Hulyo 11.
Ginpahayag dugang nga kumpiyansa sanda nga magahakot it medalya ro anang unga sa hampang nga chess sa palarong pambansa 2024 bangud sa owa it pundo kara nga pag-training ag pagpasakop sa nagkaeain-eain nga mga tournament Western Visayas.
Nasayuran nga si Clarence nga presenteng naga eskwela sa Kalibo Pilot Elementary School hay nagpang-top 11 sa ginpatigayon nga Batang Pinoy ko nagtaliwan nga dag-on.
Ginapahauman man sigon it anang unga makaron ro pagsabak sa mga international competition partikular sa Asian chess tournament.
Bilang solo parent, maskin nga medyu magastos hay ginasundan nana ro anang unga gamit ro kaugalingon nga kwarta agud nga mataw-an it moral support.
Kapin sa 4,600 pesos ro food allowance nga gintau sigon sa anang unga sa pagsabak sa kompetisyon.
