NATIONAL News — Ginpamalibaran it China nga paeag sanda sa anumang nasyon kasunod it kan-o eamang nga pahayag ni Senator Imee Marcos nga plano it Beijing nga gumamit it hypersonic missiles kun sa siin target kara ro military installations sa Pilipinas.
Ginpahayag ni China Foreign Ministry spokesperson Mao Ning nga owa sanda nakasayod kon ano ro source it nasambit nga balita , apang sambilog eamang sigon ro sigurado nga committed ro China sa peaceful development ag national defense policy nga defensive in nature, kun sa siin bukon sigon sanda it paeag sa anuman nga nasyon.
Nauna kara, eubus nga nagakabaeaka ro senadora angot sa plano sigon it China nga gumamit it hypersonic missiles kontra sa mga base militar sa idaeum it Enhanced Defense Cooperation Agreement ukon (EDCA) it Pilipinas ag Estados Unidos.
Suno kay Marcos, nga pagatargeton it hypersonic missiles ro mga EDCA sites sa nasyon bangud sa tan-aw sigon it China nga naga-apin eon ro Pilipinas sa andang kaaway.
Ro Hypersonic missiles hay sangka klase it armas nga may ikasarang nga mag-eupad sa target nga lima hasta 25 beses sa kadasig it anang tunog.
Owa man ginbulgar ni Marcos kun siin nana nabo-oe ro impormasyon.
Sa pihak kara, nagpaandam ro Tsina nga maga-react ag magahueag sanda pag-abot sa andang territorial rights.
Samtang, padayun nga naga-init ro tensyon sa gina-agawan nga West Philippine Sea kasunod it kan-o eamang nga ‘acts of aggression’ it Beijing.
Apang ginpahayag it Department of Foreign Affairs (DFA) nga kan-o eamang hay nagpatigayon it bilateral meeting ro Pilipinas ag Tsina sa Manila sa tuyo nga mapa-ugan ag madumaeahan ro diskusyon sa West Philippine Sea.
