KALIBO, Aklan — Nagapanguna sa gihapon ro mga Chinese sa nailistang tourist arrival sa isla it Boracay sa unang tatlong quarter it makaron nga dag-on.
Base sa record it Municipal Tourism Office it LGU-Malay, kapin sa 363,832 ro kabilugan nga numero it mga turistang Chinese nga nagbisita sa isla umpisa Enero hasta Setyembre ukon 44 porsiyento it 820,622 it mga dumueuong nga bakasyunista.
Raya hay ginsundan it mga Koreans nga nagbiyahe halin sa Incheon nga umabot sa 303,504 ukon 37 porsiyento it foreign arrivals ag pumangatlo ro Taiwan nga nakalista it 25,133.
Mas pang nagtaas ro numero it mga dumueuong halin sa nasambit nga mga nasyon nga nagbisita sa isla ukon 43 porsiyento it 1,601,450 arrivals sa nasambit nga period bangud sa dugang nga regional flights, maayos nga imprastraktura ag tourism appeal it Boracay.
Ginaeauman man it lokal nga gobyerno it Malay nga madugangan pa ro numero it mga local ag foreign tourist nga magabisita sa popular tourist destination sa bilog nga kalibutan matapos raya nga kilaeahong best island in Asia it Conde Nast Traveller readers.
Samtang, ro local tourists hay nakalista it 729,415 arrivals sa nasambit nga tiempo.
