KALIBO, Aklan—Nagpaguwa it Resolution No. 11191 ro Commission on Elections ukon Comelec kon sa siin nakabaehag dikara ro mga aktibidad para sa nagahilapit nga Barangay ag Sangguniang Kabataan Elections sa maabot nga Nobyembre 2, 2026.
Ginpaathag ni Chrispin Raymund Gerardo, tagapaghambae it Comelec Aklan nga sandig sa Comelec resolution, gintaeana it komisyon ro pagdihon it certificates of candidacy ukon COC para sa 2026 Barangay ag Sangguniang Kabataan Elections (BSKE) halin Setyembre 28 hasta it Oktubre 5, 2026.
Ro adlaw it eleksyon hay natyempo sa adlaw it pyesta minatay kon sa siin daya man ro unang Lunes it buean it Nobyembre ag inde pwede mapaiway ro pagpatigayon it eleksyon sandig sa nagairal nga laye.
Ro botohan hay magaumpisa it alas-7:00 it agahon ag magatapos it hasta sa alas-3:00 it hapon kon sa siin pagasundan eagi it paghueoyapan, canvassing, ag proklamasyon it mga nagdaog.
Magaumpisa ro election period sa Oktubre 3 hasta it Nobyembre 9, samtang ro campaign period hay halin it Oktubre 22 hasta it Oktubre 31, 2026.
Kadungan kara igapatuman man ro nagkaeain-eain nga ginabawaean nga hilimuon kaibahan ro nationwide gun ban halin Oktubre 3.
Mag-eowas kara, ginabawaean man ro pagbag-o it voting precincts, paggamit it security personnel it mga kandidato, pagsaylo ukon pag-detail it mga miyembro it gobyerno, ag suspension it mga nailihir nga opisyal.
