Kalibo Aklan —–Ginahueat pa it Provincial Health Office (PHO-AKLAN) ro confirmatory result it mga specimen sample nga ginpadaea sa Western Visayas Medical Center.
Raya hay ginakaeakipan it 37 ka mga repatriated seafarers ag ro lima nga unang nailistang kaso it Covid-19 sa Aklan.
Suno kay Provincial Health Officer I Dr. Cornelio Cuatchon, posible nga sa makarong dominggo hay magaabot eon ro resulta kara kon sa siin ginpasiguro nga anda man eagi nga igasapubliko.
Ginklaro nga ana it limang pasyente hay for repeat testing eot-a samtang ro mga seafarers hay ginpakamayad nga ginboe-an it swab sample maskin nga nag-negatibo ro mga raya sa anti-body rapid testing kat nag-abot sa probinsya it Aklan antes nga ginpasueod sa andang quarantine facility sa daywang ka hotel iya sa banwa it Kalibo.
Samtang sa pihak nga parte, ginpadumdom ni Dr. Cuatchon ro publiko nga inde magpakalhit it saea nga impormasyon ukon fake news sa tunga it ginapangatubang nga COVID-19 crisis.
Suno kana, ro madakpan nga nagapakalhit it saea nga balita hay pwede nga magapangatubang sa nagakaigo nga kaso sanding sa Republic Act 11469 ukon Bayanihan to Heal As One Act.
Sa idaeom it nasambitang laye, pwede makulong sa sueod it daywang buean ukon paga-imponeran it penalidad nga kapin sa 10,000 pesos ag inde magsobra sa P1-milyon pesos.
Madumduman nga nagta-o it kabaeaka sa mga pumueoyo ro nagkalhit nga fake news sa social media partikular sa facebook nga may daywang nagpositibo sa COVID-19 ag ro mga raya sigon hay halin sa repatriated seafarers nga naka-quarantine makaron sa sangka hotel sa banwa it Kalibo.
