Kalibo Aklan ———-Nagapadayun pa ro validation it Department of Agriculture Region 6 sa mga mangunguma it mais para sa pagabatunon nga P3,000 pesos nga fuel subsidy halin sa gobyerno.
Suno kay DA Region 6 spokesman James Earl Ogates, limang probinsiya eon ro andang ginpaidaeaum sa validation partikular ro Negros Occidental, Iloilo, Capiz, Guimaras ag Antique .
Medyu naulihi suno kana ro Aklan bangud nga na-stranded ro andang mga tawuhan sa Capiz sa pagtama it bagyong Agaton ko nagtaliwan nga domingo .
Kapin sa 512 sigon nga corn farmers ro nakalista sa Aklan maghalin sa banwa it Altavas, Balete, Banga, Ibajay, Madalag, Malinao ag Numancia.
Sa pihak nga parte, sa kabilugan nga 3,222 nga corn farmers beneficiaries sa bilog nga Western Visayas, 878 pa eamang ro na-validate .
Dapat suno kana nga ro sangka mangunguma hay nakalista sa andang Registry System for Basic Sector in Agriculture.
Nagtaeana ro DA it pondo nga P500 million pesos agud nga magtau it bulig pinaagi sa fuel subsidy sa mga mangunguma it mais ag mangingisda nga kinahangean nga may kaugalingon nga gina-operate nga makinarya.
Igapaagi sigon ro subsidiya sa fuel cards nga iga-isyu it Development Bank of the Philippines nga pagagamiton sa pagbakae it langis sa mga accredited nga gasoline stations.
Tuyo kara nga mapahagan-hagan ro impact it sunod-sunod nga pagtaas it presyo it langis sa andang pangabuhian.
Ginaeauman nga antes ro eleksyon hay maitau eon ro nasambit nga bulig.
Samtang, ginklaru ni Ogates nga bukon it kaibahan ro rice farmers sa listahan it mga benepisyaryo bangud nga umpisa ko 2020 hay suportado eon sanda it cash grant program nga ginatawag nga Rice Farmer Financial Assistance ukon RFFA , kun sa siin nagabaton sanda it P5,000 pesos nga cash aid.
