KALIBO, Aklan—Ginkumpirma it legal counsel it grupo it mga katutubong Ati sa isla it Boracay nga hasta sa makaron hay owa pa it sabat ro Department of Agrarian Reform ukon DAR Region 6 sa andang gindihon nga pinaka-ulihing motion for reconsideration kontra sa protesta it sangka developer nga nagabawi sa eugta nga gintau kanda it gobyerno pinaagi sa Certificate of Land Ownership Awards ukon CLOA’s.
Masubo suno kay Atty. Dennis Dinopol nga ro gobyerno ro nagtau it eugta sa mga katutubo, apang ro gobyerno man ro magabawi kara makaron.
Nauna eon nga nagpaguwa ro DAR it resolution nga nagamandu sa mga nagdihon it protesta nga mag- file it cancellation it CLOA’s nga engkaso nga maaprubahan hay pagataw-an it go signal ro mga property developers nga boe-on ro eugta.
Nasayuran nga raya eon ro ikalimang mosyon nga andang gindihon, apang indi pa nanda matumod kon hin-uno ro mga raya makaangkon it sabat.
Nagapameligro nga mabawi sa mga katutubo ro gintau kanda nga eugta ko tiempo it duterte administration, sa tunga it claims nga raya hay owa nagakabagay para sa pagpanguma ukon agricultural production.
Sa ap-at nga magkaseparado apang magka-anggid nga resolusyon nga ginpaguwa umpisa ko Marso, ginpaburan it DAR Western Visayas ro protesta nga ginpasaka it property developers sa kapin sa 4,800 square meters it eugta nga gin-award sa kapin sa 15 nga pamilya it mga Ati bilang land reform beneficiaries sa Barangay Manocmanoc sa Boracay.
Nagapati si Atty. Dinopol nga raya hay maeawig pa nga proseso bangud nga engkaso nga magdaog ro mga develop sa andang protesta hay igadangop nanda ro kaso sa sekretaryo mismo it DAR ag kon uman nga mapas-eawan hay igapasaka nanda ro isyu sa korte suprema.
Paga-obrahon man sigon nanda nga depensa sa kaso ro Indigenous People’s Rights Act of 1997, ukon RA 8371 kun sa siin raya ro laye nga nagakilaea ag naga promote sa kinamatarung it mga indigenous cultural communities ag indigenous peoples sa Pilipinas.
