Bumalik sa Pilipinas si dating Iloilo City Mayor Jed Patrick Mabilog matapos ro haeos pitong dag-on nga pagtinir sa ibang nasyon. Sambilog imaw nga nakaibahan sa listahan it mga narco-politician ko administrasyon ni dating Pangueong Rodrigo Duterte.
Nag-abot si Mabilog sa Ninoy Aquino International Airport (NAIA) Terminal 3 bandang alas-11:00 it agahon, Setyembre 10, 2024, sakay it Cathay Pacific halin sa New York. Pag-abot nana, ginsug-aeaw imaw it mga operatiba it National Bureau of Investigation (NBI). Sa eksklusibong interview it Bombo Radyo, ginkumpirma ni NBI Director Jaime Santiago nga boluntaryong nagsurender si Mabilog sa mga tawuhan it NBI NCR.
Suno kay Santiago, gindihon kay Mabilog ro sangka warrant of arrest bangud sa pag-eabag sa RA 3019 (Anti-Graft and Corrupt Practices Act) ag sa Code of Conduct and Ethical Standards. Gindihon ro warrant sa NAIA Terminal 3 it NBI-IAID sa Pasay City. Presenteng una sa kustodiya imaw it NBI-IAID ag nagapaidaeom sa proseso. Gindaea si Mabilog sa Sandiganbayan kon sa siin saan nagpiyansa imaw it ₱90,000 para sa anang temporaryong kahilwayan.
Ginaeauman man nga magatambong si Mabilog bilang sambilog sa mga resource person sa uman nga pagpadayon it Quad Committee House Probe sa Huwebes.
