KALIBO, Aklan—Gin-engganyo it Department of Education it Aklan ro mga ginikanan nga ihingagaw sa pagpaenrol ro andang mga onga kamana man ro mga estudyante nga magatapos makaron nga adlaw it Martes, Hunyo 30.
Suno kay Schools Division Superintendent Miguel Mac Aposin it DepEd Aklan, kapin sa 60 percent ro turn-out it enrollment hasta kahapon it alas-4:00 it hapon para sa school year 2020-2021 nga nakataeanang magabukas ro klase sa Agosto 24.
Nauna kara nga nagpatigayon it remote ag physical enrollment ro DepEd sa mga pampublikong eskwelahan para pahauman ro uman nga pagbukas it klase sa tunga it ginapangatubang nga pandemya.
Apang nauna eon nga gin-insister ni Pangueong Rodrigo Duterte nga uwa it face to face classes nga matabo sa pagbukas it klase para sa school year 2020-2021 hasta nga uwa it bakuna nga madiskubre para sa Covid-19.
Apang, nakahaom sigon ro DepEd sa anumang hangkat kaangot sa nakataeanang implementasyon it mga alternatibo sa pisikal nga mga klase, kaparehas it online ukon modular learning para sa nagahilapit nga pagbukas it klase.
