KALIBO, Aklan—Haum eon ro Department of Education ukon DepEd-Aklan sa pagbukas it full implementation it in-person classes sa probinsiya sa maabot nga Nobyembre 2, 2022.
Suno kay Dr. Feliciano Buenafe, DepEd Schools Division Superintendent nga sa pagpatuman it limited face to face classes ko Agosto hay owa man sanda it may nasumaeang nga anuman nga mabahoe nga problema.
Mag-eowas kara, praktisado eon nanda ro tanan nga dapat nga obrahon sa idaeum it basic education learning continuity plan kun sa siin hugut nga igapatuman ro mga health protocols kontra sa COVID 19 kaibahan ro pag-practice it tamang paghugas it alima ag pagsuksok it face mask.
Kadungan kara, ro pagpasiguro nga masarangan nga i-accommodate ro tanan nga mga estudyante bangud sa bastante nga numero it mga classroom.
Samtang, aminado si Dr. Buenafe nga bangud nga nakaangkon it ‘learning gaps’ ro mga estudyante bangud sa daywang dag-on nga pandemya, todo kayod sigon makaron ro mga manugturo agud nga masabat ag mapun-an nanda raya partikular sa reading ag numeracy.
Maabu suno kana nga mga grade 1 learners ro indi pa masyado kaintigo nga magbasa ag maghuyap.
Angot kara, nag apela it bulig ag suporta si Dr. Buenafe sa mga ginikanan ag nagkaeain-eain nga sektor it sosyudad nga makipagbueuligan sa full face to face classes sa atubang it ginapangatubang nga paeag it COVID 19 pandemic.
