KALIBO, Aklan — Ginklaru makaron it Department of the Interior and Local Government ukon DILG-Aklan nga ro Memorandum Circular No. 121-2019 hay para sa pagbo-oe it mga road obstructions ag bukon it para sa katuyuan nga mapaeapad ro mga karsadahon ukon road widening.
Suno kay DILG provincial director Engr. Carmelo Orbista nga raya ro kaundan it ginpaguwa nga press release ni DILG Sec. Eduardo Año matapos nga makabaton ro andang taeatapan it mga report halin sa La Union ag iba pang parte it nasyon nga may mga contractor sigon it DPWH ag LGU units ro nagagamit sa nasambit nga memo sa pagbo-oe it mga magueang eon nga mga puno it kahoy, pag-demolish it waiting sheds kamana man ro mga sab-eag sa sidewalks ag maskin sa mga pribadong lote.
Nauna eon nga gin-abisuhan it DILG ro mga lokal nga gobyerno ag DPWH district engineers nga i-remind ro andang mga contractors angot sa sakop it nasambit nga memo.
Dugang pa ni Engr. Orbista nga kinahangean nga ire-establish it mga LGUs ro mga naga-eksister nga daeanon sa andang nasakupan.
Kinahangean man suno kana nga ro provincial government ro nagapanguna sa mga road widening project para sa implementasyon it mga infrastructure projects.
Nasayuran nga tuyo it MC 121-2019 hay ro pagsunod sa mandu ni Pangueong Rodrigo Duterte nga maibalik sa publiko ro mga pampublikong daean nga gingamit sa pribadong pamaagi, kun sa siin, ro deadline kara hay sa Setyembre 29 eon.
Gindugang pa kara nga kinahangean nga magbueuligan ro munisipyo ag barangay agud nga maka-eagas sa deadline .
