KALIBO, Aklan—Padayun nga ginasunod it Department of Health ukon DOH-Aklan ro Inter-Agency Task Force ukon IATF Resolution No. 18 partikular ro pagsuksok it face masks bilang depensa sa COVID-19.
Suno kay J-Lorenz Dionesio it Provincial Health Office ukon PHO-Aklan nga ginaprotektahan it face masks ro publiko bukon eamang sa COVID-19 kundi maging sa iba pang mga sakit kapareho it nagakalhit makaron sa bilog nga kalibutan nga monkeypox.
Ginpahayag dugang nga pwede eamang nga boe-on ro face masks kada nagakaon ukon maga-exercise.
Raya hay kasunod it kontrobersiyal nga mandu ni Cebu Governor Gwendolyn Garcia nga optional ro paggamit it face mask sa open spaces.
Gindugang pa ni Dionesio nga importante sa gihapon ro pagsuksok it face mask eabi pa ag nagatinaas eon man ro mga kaso it COVID 19 sa bilog nga nasyon kamana man nga may mga sub-variant nga nakasueod sa nasyon ag nagahina nga immunity ukon epekto it bakuna kontra sa virus.
Kabigon eon sigon nga kaparte it new normal ro pagsuksok it face mask.
Bangud kara, importante suno kana nga magpaturok it booster shot bilang dugang nga proteksyon.
