Nagpaguwa ro Department of Labor and Employment (DOLE) it Labor Advisory No. 5 Series of 2025 bilang sueundan sa tamang pasahod sa mga trabahador sa pribadong sektor para sa Mayo 1, Labor Day, nga gindeklara bilang regular holiday.
Suno sa DOLE, ro mga empleyadong maga-trabaho sa regular holiday hay magabaton it double pay para sa unang waeong oras it trabaho. Para man sa mga oras nga eagpas sa waeong oras, dugang nga 30% it orasang sweldo ro dapat itao bilang overtime pay.
Samtang, ro mga uwa ga sueod sa trabaho sa Mayo 1 hay maga-baton gihapon it 100% it andang adlawang sweldo, basta sanda hay nagsueod ukon naka-leave with pay sa adlaw bago ro holiday. Kun ro adlaw bago ro holiday hay natyempo bilang rest day ukon non-working day, kinahangean eamang nga ro empleyado hay nagsueod ukon naka-paid leave sa ulihinh working day antes ro Mayo 1 agud makabaton it holiday pay.
Ginpadumdom man it DOLE nga ro mga trabahador nga natyempong rest day sa Mayo 1 apang nagtrabaho hay makabaton it dugang nga 30% it andang basic wage para sa unang waeong oras, ag dagdag pang 30% it orasang sweldo para sa overtime work.
Ro sueundan ngara hay parte it ginatuyo it DOLE nga siguraduhon ro makatarungan ag tamang benepisyo para sa mga trabahador sa tyempo it regular holidays.
